குழந்தையா? பெரியோரா?

சூப்பர் சிங்கர் ஜூனியர் இறுத்திச் சுற்றுக்கான உற்சாக விழியம் (ப்ரோமோ) மிக நன்றாக எடுக்கப்பட்டிருக்கிறது!


Super Singer Junior 3 Grand Finale - Promo von anjalimarb

இங்கு காட்டப்படும் சித்திரம், இவர்கள் குழந்தைகள். இன்னும் வெகுளித்ட்த்னம் உள்ளது என்பது. உண்மைதான். ஆனால், நிகழ்ச்சியில் இவர்களுக்குக் கொடுக்கப்படும் உடை பெரியவர்களுக்கான உடை. இவர்கள் ஒரு காதில் கடுக்கன், இவர்களது நடை, உடை, பாவனை எல்லாம் பெரியர்கள் எனும் தோற்றத்தைத் தர முயல்பவை. இதுவொரு முரண்பாடு.


Super Singer Junior 3 Grand Finale - Promo von anjalimarb

இவர்கள் குழந்தைகளா? ஜூனியர்களா? இல்லை சீனியர்களா? ;-)

Thoughts on Airtel Super Singer Junior (SSJ3) Finals

நான் சிறுவனாக வளர்ந்த ஊரில் கோரக்கன் கோயில் என்றொன்றுண்டு. ஆசையாக வளர்த்த கடாவை அங்கு கொண்டு வந்து கோரக்க சித்தருக்கு காணிக்கையாக வெட்டுவார்கள். பார்க்க பரிதாபமாக இருக்கும். ஏனோ, இந்த சூப்பர் சிங்கர் ஜூனியர் 3 குழந்தைகளைப் பார்க்கும் போது இது நினைவிற்கு வருகிறது. பாருங்களேன், பிரகதி, சுகன்யா இருவரும் முறையாகக் கர்நாடக சங்கீதம் கற்றவர்கள். சுருதி சுத்தமாகப் பாடக்கூடியவர்கள். ஆனால் நேற்று சென்னையின் ஏதோவொரு மாலில் கட்டுக்கடங்காத ஒரு கூட்டத்தின் முன்னிலையில், ‘பாடு’ என்று சொன்னபோது, இத்தனை நாள் கற்ற வித்தையும் காற்றில் பஞ்சாய் பறக்க. ஒருவருக்கு மேல் ஒருவர் என்று இத்தனை நாள் மெருகேற்றி வந்த இசை, ‘இவளுக்கு நான் என்ன குறைச்சல்’ எனும்படி படுமோசமாகப் போனது. நேற்றுப்பாடிய ஐவரில், யாழினி மட்டும்தான் ஏதோ சுமாராகப்பாடினார். ஏன் இந்த பலிகடா விளையாட்டு? பாவம்! இவர்கள் ஒரு contained environmentல் தங்களுக்குள் சிரித்து மகிழ்ந்து கற்றுத்தேறி, தேர்ந்த மூன்று நடுவர்களின் கூர்மையான பார்வையிலும், ஒரு தேர்ந்த குரல் விற்பன்னரின் கண்காணிப்பிலும் பாட்டுப்பாடி திறமை வளர்த்துவிட்டு, இவையெல்லாம் எதற்கு என்றால், இசை ஞானம் அதிகமற்ற ஒரு பொதுக்கூட்டத்தில் இராகம், பேதமற்ற வெறும் ‘குத்துப்பாட்டு’ பாடத்தான் என்றால், something is terribly wrong! என்று எண்ணத்தோன்றுகிறது. சென்ற பருவத்திலும் இப்படித்தான் சத்ய பிரகாஷ், பூஜா, சந்தோஷ், ஸ்ரீநிவாஸ் இவர்களெல்லாம் படிப்படியாய் முன்னேறி வந்த பின் திடீரென்று பொதுமக்களின் ஓட்டுக்கு மன்றாடு என்று force செய்யப்பட்ட போது அவர்களுக்கு ஒன்றும் புரியவில்லை. They miserably failed! 

இசையின் நுணுக்கமறிந்த ஒரு சூழலில் உருவாக்கப்பட்ட ஒரு தேர்வை கட்டக்கடைசியில் ஒன்றுமே அறியாத பொதுமக்கள் முடிவிற்குக் கொண்டு வரவேண்டிய கட்டாயமென்ன? புரியவே இல்லை!



பொதுமக்களுக்கான இசை, எனவே பொதுமக்கள்தான் தீர்மானிக்க வேண்டுமென்று சொல்லமுடியாது. ஏனெனில் அந்த மெல்லிசையை அவர்களுக்கு அளிக்கும் composers களுக்கு நல்ல இசை ஞானம் உண்டு. இளையராஜா தன்னை ‘இசை ஞானி’ என்று சொல்லிக்கொள்கிறார். ஏ.ஆர்.ரகுமானுக்கு கர்நாடக, ஹிந்துஸ்தானி இசையின் நுணுக்கங்கள் நன்றாகத்தெரியும். அவர்களோடு பணிபுரியத்தான் இக்குழந்தைகள் தயார்படுத்தப்படுகின்றனர். பொது மக்களுக்கான இசை மேடையில் பாட இவர்கள் தயார்படுத்தப்படவில்லை.

மக்கள் ஓட்டுப்போடும் போது ஏர்டெல் கம்பெனிக்கு வருமானம் வருகிறது! என்று சொல்லலாம். உண்மை என்னவெனில், ஒரு வருடமாக நடத்தப்படும் இந்நிகழ்ச்சியை ஸ்பான்சர் செய்யும் ஏர்டெல் இந்த ஒரு நாள் ஓட்டு தரும் வருமானத்தை நம்பி செயல்படவில்லை. 10 லட்சம் ஓட்டு என்றால், அனைத்தும் ஏர்டெல் சம்பாத்யம் என்று கொள்ள முடியாது. இணையம் மற்றும் வேறு, வேறு கம்பெனிகளுக்கு வருமானம் பிரிக்கப்படுகிறது என்பதே உண்மை. மேலும் விஜய் டிவி இவ்வளவு மூலதனம் போட்டு இதை நடத்துவதற்குக்காரணம் இந்நிகழ்ச்சியின் பாப்புலாரிடியை வைத்து வரும் விளம்பர வருமானம் என்பதைக் குறிவைத்தே! எனவே it makes no sense to throw the final performance to public voting!

இப்படி பொதுமக்கள் பார்வைக்கு என்று வருவதால் சின்னக்குழந்தைகளுக்கு ’மேக் அப்’ அது இதுவென்று போட்டு, ‘பிஞ்சிலே பழுக்க வைக்க முயல்கிறார்கள். பாவம், கௌதம் எனும் கிராமத்துச் சிறுவனின் அழகே அவனது தமிழ்ப் பண்பாடுதான். அவனது கூச்சம், மரியாதை, வெகுளித்தனம் இவை கூடிய திறமை இதுதான் அவன் முத்திரை. அவனை மாலில் வைத்து அங்குள்ள இளம் பெண்களுக்கு பிளையிங் கிஸ் கொடு என்று பாவனா சொல்லிப்பழக்குவது கொஞ்சம் வக்கிரமாகப்பட்டது! இதே போல்தான், கட்டுபட்டியான முஸ்லிம் குடும்பத்திலிருந்து வரும் ஆஜீத்தை இப்போது காதலிக்கு எப்படி propose செய்வது என்று பழக்கப்படுத்துவது குட்டிக்குழந்தைகளின் மனதில் வக்கிர எண்ணங்களைப் புகுத்துவது போல் படுகிறது. ஆஜீத்தின் அம்மா, கல்யாணம் ஆகும் சில கணங்களுக்கு முன்புவரை தன் கணவன் யாரென்று தெரியாமல்தான் திருமணம் செய்து கொண்டு இருக்கிறார். ஒரு தலைமுறையில் இத்தனை மாற்றமா? இது எதற்காக? விஜய் டிவி இதை ஏன் முனைந்து செய்ய வேண்டும்?

ஒருவகையில் இந்நிகழ்ச்சியின் மூலமாக குழந்தைகளின் பாடும் திறம் கண்டுபிடிக்கப்பட்டு சினிமா தொழிலுக்கு நல்ல பாடகர்கள் கிடைக்கிறார்கள் என்பது உண்மை. இந்நிகழ்ச்சி பார்ப்பதன் மூலம் நடுவர்களுடன் சேர்ந்து பொதுமக்களின் இசைத்திறன் வளர்கிறது என்பதும் உண்மை. இவ்வளவிற்கும் ஈடாக மேலே சொன்ன விஷயங்கள் காவு கொடுக்கப்படுக்கின்றன? இங்குதான் கர்நாடக சங்கீத பாரம்பரியத்திற்கும், சினிமாப்பாரம்பரியத்திற்குமுள்ள வித்தியாசம் அப்பட்டமாகத்தெரிகிறது. கர்நாடக இசையின் சாகித்ய கர்த்தாக்கள் இறைவனுக்காகப் பாடினார்கள். ஆன்ம வளர்ச்சியூட்டும் கீதங்களை உருவாக்கினர். அக்கீர்த்தனைகளைப்பாடும் போது மனது சுத்தமாகிறது, ஆன்மநேயம் வளர்கிறது, மனிதன் பூரணமாகிறான். ஆனால் அல்லும் பகலும் கொச்சையான பொருளுள்ள சினிமாப்பாடல்களை இக்குழந்தைகள் பாடும் போது காம இச்சை வளர்கிறது. காமம் உள்ளமெங்கும் குடிபோகிறது. எளிமையே தோற்றமாக இந்நிகழ்ச்சிக்கு வந்து பாடிய சுகன்யா எங்கே? இப்போது அல்ட்ரா மாடர்னாக டிரஸ் செய்து கொண்டு குத்துப்பாட்டு பாடும் சுகன்யா எங்கே? இழந்தது எது? She lost her innocence!

நிறைய யோசிக்க விஷயமுள்ளது.

சூப்பர் சிங்கர் சிந்தனைகள்

சின்னத்திரையின் நல்ல நிகழ்ச்சிகளிலொன்று சூப்பர் சிங்கர் 3 எனும் தமிழகத்தின் ‘செல்லக்குரலுக்கான தேடல்’ நிகழ்ச்சியாகும்! மெல்லிசை என்பது நீண்ட பரிணாமத்தைத் தமிழ் மண்ணில் கண்டிருக்கிறது! ’கூத்தாடிகள்’ என்று சமூகம் புறக்கணித்த ஒரு துறை மெல்ல, மெல்ல வளர்ந்து சமூக, அரசியல் வளர்ச்சிக்குத் துணை போகும் அளவிற்கு இக்காலக்கட்டத்தில் மாறியிருக்கிறது. தமிழகத்தின் அரசியல் தலையெழுத்தே சினிமாவால் மாறிவிட்டது. எம்.ஜி.ஆருக்குப் பின் தான் ஒரு ரொனால்டு ரீகனும், Arnold Schwarzenegger ம். அடுத்து கர்நாடக மெட்டில் மட்டுமே அமைந்திருந்த சினிமா இசை மெல்ல, மெல்ல பிற இசை பாணிகளையும் தனதாக்கிக் கொண்டு இன்று மெல்லிசையாக மலர்ந்திருக்கிறது. இவ்வளர்ச்சியின் உச்சம்தான் ஏ.ஆர்.ரகுமானின் ஆஸ்கார் பரிசுகள். இது தமிழ்ச் சினிமா இசையின் உலக அங்கீகாரம். எனவே இந்தச் சினிமா இசையை கிளிப்பிள்ளை போல் வந்து ஒப்புவிக்கும் போட்டியல்ல சூப்பர் சிங்கர் 3 நிகழ்ச்சி. மெல்லிசையின் நெளிவு சுளிவுகளை முறையாகப் புரிந்து கொண்டு அதைக் கிரகித்து வளரும் கலைஞர்களின் பரிணாமத்தைக் காட்டும் நிகழ்ச்சியே சூப்பர் சிங்கர் 3. 

எனவே இனிமேலும் தந்த கோபுரத்தில் நின்று கொண்டு இது பற்றிப் பேசுவது இழிவு என்பது போன்ற அறிவுஜீவிதப்பார்வை தவிர்க்கப்பட வேண்டும்.  வெறும் மொட்டுக்களாக இந்நிகழ்ச்சிக்கு வரும் சிறுவர், சிறுமிகள் இன்று உலகம் முழுவதும் மணம் வீசும் மலர்களாக இந்நிகழ்ச்சியால் மலர்ந்துள்ளர். நல்ல உதாரணம், எவ்வித இசைப்பின்னணியும் இல்லாத ஆஜீத் இன்று சூப்பர் சிங்கராக உலா வருவது. வெறும் கனவை மட்டும் கையில் வைத்து மழலை பேசும் சிறுமியாக நுழைந்து இன்று சூப்பர் சிங்கராகியிருக்கும் யாழினி.  பாலக்காட்டு குக்கிராமம் ஒன்றிலிருந்து சின்ன முடிச்சுடன் வரும் சிறுமி போல் உள்ளே நுழைந்து வெற்றியின் உச்சத்தில் இருக்கும் சுகன்யா!

வன அட்டை (wild card) முடிவுகள் வந்துவிட்டன. எதிர்பார்த்தது போலவே ஆஜீத்தும், யாழினும் தேர்வாகியுள்ளனர். அது எப்படி எதிர்பார்த்த படியே முடிவு வருகிறது? ஏதோ சில்மிஷம் இருக்கிறதோ? விஜய் டிவி என்றுமே இந்த விஷயத்தில் ஒளிவு மறைவின்றி நடந்து கொண்டதில்லை. சென்ற பருவத்திலும் சொதப்பியது. மக்கள் ஓட்டு என்று அது சொல்லும் எண்ணிக்கைகளை நாம் நம்பித்தான் ஆக வேண்டும். வெளிநாடுகளில் நடக்கும் இத்தகைய நிகழ்வில் ஓட்டு போடப்போட எல்லோருக்கும் தெரியவரும். இதை மறைக்கத்தான் புதிய நடுவர்கள் மதிப்பீடு எனும் கோல்மால். Anyway, both Aajeeth and Yazini deserve this honour! 

இந்த செட்டுப் போடுவது, கேமிரா அமைப்பது இதிலெல்லாம் இன்னும் விஜய் டிவி வளரவேண்டும். மேடை இவ்வளவு இருட்டாக எங்கும் கண்டதில்லை. Pretty gloomy! The zooming by the camera man is  very dizzy!

ஆனாலும் இந்த நிகழ்ச்சியின் இசைத்திறம் அளவிட முடியாத உயர்ந்த இடத்தில் நிற்கிறது. அது தமிழ்நாட்டின் இசைப்பாரம்பரியத்தைச் சுட்டுவதாகத் தோன்றுகிறது! வெளிநாட்டு நிகழ்ச்சிகளோடு ஒப்பு நோக்கும் போது இது எங்கோ உயரத்தில் நிற்கிறது. எத்தனை திறமைகள், என்னென்ன குரல்வளம். தமிழ்நாடே பெருமிதப்படும் அளவிற்கு இருக்கிறது. சங்கம் தொடங்கி இன்றுவரை வந்தாரை வாழவைக்கும் பூமியாக தமிழ்நாடு உயர்ந்தோங்கி நிற்கிறது. இந்நிகழ்ச்சியிலும் கனவுகளோடு ஆந்திரா, கேரளா, இலங்கை (வெளிநாட்டு இலங்கையர்) போன்ற இடங்களிலிருந்து குழந்தைகள் வந்து நல்ல தமிழ் பேசக்கற்றுகொண்டு, தமிழ்ப் பாடல்களை நல்ல உச்சரிப்போடு பாடுவது பெருமைக்குரிய விஷயம். இந்திய ஒற்றுமைக்கு எடுத்துக்காட்டாக தமிழகம் திகழ்வது இந்தியத் தேசியத்தின் நல்லூழ்!

இந்நிகழ்ச்சி மிகவும் தோழமையோடு நடைபெறுவது சிறப்பு. போட்டி இருந்தாலும் பொறாமை இல்லாமல் குழந்தைகளும், தாய்மார்களும் நடந்து கொள்வது தமிழகம் எவ்வளவு முன்னேறிவிட்டது என்பதைக் காட்டுகிறது! காதல் திருமணம் என்ற ஒரே காரணத்திற்காக கேரள முஸ்லிம் குடும்பமொன்று தன் பெண்ணை தூர விலக்கிவிடுகிறது. இக்காதலர்களை தமிழகம் வாழ வைத்து, அவர்களது குழந்தையை சூப்பர் சிங்கராக்கி, இன்று இக்குடும்பத்தை இப்பிரபல நிகழ்ச்சியின் மூலம் ஒன்று சேர்த்து வைத்துள்ளது. அந்த வகையில் குடும்பத்தோடு காணத்தக்க ஒரு நிகழ்ச்சி இது!


Airtel Part 4 von khajal

முறையான தேர்வில் பாலக்காட்டு பாட்டுக்குயில் சுகன்யா, அமெரிக்காவின் அபூர்வக்குரல் பிரகதி, தூத்துக்குடியின் இசை முத்து கௌதம் இருக்கின்றனர். இன்று இம்மூவருடன் யாழினி, ஆஜீத் சேர்கின்றனர். நல்ல தேர்வு. போட்டி கடுமையாக இருக்கும். ஆஜீத்தும், யாழினும் crowd pullers. இவர்களோடு தாக்குப்பிடிக்கக்கூடியவர் பிரகதி மட்டும்தான். ஆனால் சில நேரம் அவரை நம்ப முடிவதில்லை. சுகன்யா தத்தித்தத்தி நடந்து ஒரு தேர்ந்த இசைஞராகிவிட்டார். முறையான அளவு கோலில் இவரும், பிரகதியும் தான் சம அளவில் நிற்கின்றனர். பிரகதிக்கு ‘டைட்டில்’ முக்கியமில்லை. அதுவே அவரது ப்ளஸ் பாயிண்ட். சுகன்யா டைட்டிலுக்காக எந்த அளவு கஷ்டத்தையும் ஏற்றுக்கொள்ளக் கூடியவர்.

கௌதம் இவர்கள் போல் அல்லாமல், இயற்கையான குரல் வளத்தால் முன்னேறி வருபவர். ஆஜீத் ஒரு இசைப்புயல். 4 லட்சத்துச்சொச்சம் ஓட்டு வாங்கியிருப்பதாகச் சொல்கிறார்கள். இவரது ஓட்டு மட்டும் சென்ற பருவத்தின் மொத்த ஓட்டு எண்ணிக்கைக்கு அதிகமாம். எனவே இது கௌதம் அவர்களுக்கு பெரிய (புதிய) சிக்கலை உருவாகியுள்ளது.. அவர் நிலைப்பாடு ஆட்டம் கண்டுள்ளது. யாழினி ‘டைட்டிலை’ வெற்றி கொள்ளும் குழந்தை என்று சொல்ல முடியாது. அவள் இன்னும் வளர வேண்டும். 60 லட்சம் வீடு யாருக்கு சரியாகப் பொருந்தும்? என் மதிப்பீட்டில், சுகன்யா, கௌதம், யாழினி இவர்களுக்கு. பொறுத்திருந்து பார்ப்போம். நிறைய சொதப்பல்களை இன்னும் காண வேண்டி வரலாம் :-)


தீபம் தொலைக்காட்சியின் ‘இலக்கியச் சோலை’யில் நா.கண்ணன்



எழுத்தாளர் பி.ஏ.கிருஷ்ணன் லண்டன் வந்திருந்த போது தமிழ் மரபு அறக்கட்டளை மற்றும் விம்பம் இணைந்து நடத்திய இலக்கிய நிகழ்ச்சியின் தொலைக்காட்சி வடிவம். பி.ஏ.கிருஷ்ணனின் எழுத்து விமர்சிக்கப்பட்டு அவருடன் ஒரு கலந்துரையாடல் நடைபெற்றது. இந்நிகழ்வை தீபம் தொலைக்காட்சி ஒளிவடிவாக்கி இலக்கியச் சோலை எனும் நிகழ்ச்சியின் மூலமாக இங்கு வழங்குகிறது. அதன் முதல் பகுதி இது!

விவேகாநந்தரும் உலகச் சிந்தனை வளர்ச்சியும்


U. S. A.,
9th July, 1895.

. . . About my coming to India, the matter stands thus I am, as your Highness well knows, a man of dogged perseverance. I have planted a seed in this country; it is already a plant, and I expect it to be a tree very soon. I have got a few hundred followers. I shall make several Sannyâsins, and then I go to India leaving the work to them. The more the Christian priests oppose me, the more I am determined to leave a permanent mark on their country. . . . I have already some friends in London. I am going there by the end of August. . . . This winter anyway has to be spent partly in London and partly in New York, and then I shall be free to go to India. There will be enough men to carry on the work here after this winter if the Lord is kind. Each work has to pass through these stages — ridicule, opposition, and then acceptance. Each man who thinks ahead of his time is sure to be misunderstood. So opposition and persecution are welcome, only I have to be steady and pure and must have immense faith in God, and all these will vanish. . . .

Vivekananda.

The Complete Works of Swami Vivekananda | Volume 5/Epistles - First Series XLVIII Friend

விவேகாநந்தருக்கு இந்தியாவும் உலகமும் எவ்வளவோ கடமைப்பட்டிருக்கிறது. இன்றைய உலகில் cross cultural dialogue, inter-religious dialogue என்பவையெல்லாம் சாத்தியமென்றால் அதற்கு வித்திட்டவர் விவேகாநந்தர். அவர் ராஜபாட்டை போட்ட பின் தான் அத்தனை இந்திய ஞானிகளுக்கும் மேற்குலகில் மரியாதை கிடைத்தது. பண்டைய இந்தியாவின் பெருமையை மீட்டுத்தந்த புண்ணியமும் இவரையே சார்கிறது. அவர் வாழ்ந்த காலத்தில் (ஏன் இன்றும் கூட) வெறும் பல்லக்குத்தூக்கிகளாக, தன்மானமற்று இருந்த இந்தியர்களை தலைநிமிர வைத்தது இவரது வாழ்வு.

இவரது கடிதத்தில் தொணிக்கும் தன்னம்பிக்கை வெறும் வாய், வார்த்தையன்று. செய்து காட்டிய விஷயங்களுக்கு வெள்ளோட்டமாக விழுகின்றன அவை. எப்படி இந்த மனிதரால் அது முடிந்தது? இதே கருத்தரங்கில் பல இந்தியர்கள் வந்திருந்தனர். யாருக்கும் உலகைப் புரட்டிப்போட வேண்டும் என்ற துணிவு இல்லை. இவரோடு ஆன்மீகத்தொடர்பு கொண்ட சில இந்தியர்கள் வெறும் கோமணாண்டிகளாக இருந்த போது இவருக்கு மட்டும் எப்படி உலகின் இராஜா என்ற சிம்ம சொப்பனம் வந்தது?



இவர் உலகின் சிந்தனைப் போக்கையே மாற்றிவிட்டார் என்று சொல்ல வேண்டியுள்ளது. உதாரணமாக இவரது காலத்தில் கிறித்தவமதம் என்பது உலகின் மிக உயர்ந்த தத்துவ ஞானம் செறிந்த மதம், அதற்கு இணை ஏதும் கிடையாது என்ற எண்ணம் இருந்தது. இதனால்தான் இங்கிலாந்திலிருந்து உலக சமயப் பேரவைக்கு கிறிஸ்தவ மதப்பிரதிநிதிகளை அனுப்ப வேண்டிய தேவையில்லை என்று சொன்னார்கள். ஆனால் இந்த மனிதர் சில ஆண்டுகளில் எல்லாவற்றையும் தலைகீழாக மாற்றிவிட்டார். ஏன்? இவரை சந்தித்த அமெரிக்கப் பேராசிரியர் ஒருவர் இப்படி எழுதுகிறார்:

On learning that Vivekananda lacked credential to speak at the Chicago Parliament, Wright is quoted as having said, "To ask for your credentials is like asking the sun to state its right to shine in the heavens."[citation needed] Wright wrote a letter to the Chairman in charge of delegates, "Here is a man who is more learned than all of our learned professors put together."[citation needed] [ http://en.wikipedia.org/wiki/Swami_Vivekananda ]

விவிலியத்தை வியாக்கியானம் செய்யும் மரபு கிடையாது. தேவ சபை என்ன சொல்கிறதோ, அதுவே இறுதிச்சொல். ஆனால் இன்றைய கிறிஸ்தவம் மிகவும் மாறிவிட்டது. எத்தனையோ இந்துக் கருத்துக்களை உள்வாங்கி செழிப்புற்று நிற்கிறது. எனது நண்பர்கள் விவிலியத்தை வியாக்கியானம் செய்ய வேண்டுமென்று ஆசைப்படுகின்றனர். விவிலியத்திற்கு பல்வேறு ‘நிர்வாகம்’ செய்தவர்கள் விவேகாநந்தரும், பின்னால் பரமஹம்ச யோகாநந்தரும். இவர்களே யேசுவை ஒர் யோகி என்று கண்டனர்.

விவேகாநந்தரின் அறிவுச்சிறப்பை அறிந்த அமெரிக்கா அவரை ஹார்வேர்டு பல்கலைக்கழக கிழக்கத்திய தத்துவத்துறைக்கு தலைவராக இருந்து செயல்படும் படி கேட்டது:

He received two academic offers, the chair of Eastern Philosophy at Harvard University[95] and a similar position at Columbia University. He declined both, saying that as a wandering monk, he could not settle down to work of this kind.

http://en.wikipedia.org/wiki/Swami_Vivekananda

ஒருமுறை, ஒரு பார்ட்டியில் ஒரு பாட்டி சொன்னாள், ”உலகின் இதயம் இந்தியா!” என்று. அப்படி அவளைச் சொல்ல வைத்தது விவேகாநந்தரின் காருண்யமிக்க உலகச் செயற்பாடு.


இந்தியாவின் ஆன்மீக சிறப்பை உலகறியச் செய்தவர்கள் வரிசையில் முதலிடம் விவேகாநந்தருக்கே. சமகால இந்தியப்புரிதல் என்பது இவரிடமிருந்தே பிறக்கிறது:


விவேகாநந்தர்:  12 January 1863–4 July 1902

பரமஹம்ச யோகாநந்தர் January 5, 1893 – March 7, 1952

ஜிட்டு கிருஷ்ணமூர்த்தி May 11, 1895 – February 17, 1986

ஸ்வாமி பிரபுபாதா 1 September 1896 – 14 November 1977

மகரிஷி மகேஷ் யோகி 12 January 1918 – 5 February 2008

ஓஷோ 11 December 1931 – 19 January 1990

தீபக் சோப்ரா  October 22, 1946


இந்தியாவின் ஆன்மீக/அறிவியல் சிறப்பை உலகறியச் செய்தவர்கள்:


The Tao of Physics: An Exploration of the Parallels Between Modern Physics and Eastern Mysticism  by physicist Fritjof Capra (1975)

Wholeness and the Implicate Order by David Bohm (1980)

Quantum Healing by Deepak Chopra (1988) In 1998 Deepak Chopra was awarded the parody Ig Nobel Prize, in the physics category, for "his unique interpretation of quantum physics as it applies to life, liberty, and the pursuit of economic happiness".

Amit Goswami , The Self-Aware Universe 1993


சூப்பர் சிங்கர் 3 சிந்தனைகள்....

சூப்பர் சிங்கர்ஸ் 3 எனும் தமிழகத்தின் செல்லக்குரலுக்கான தேடல் இப்போது காலிறுதி போட்டிக்கு வந்திருக்கிறது. ஆயிரக்கணக்கில் போட்டிக்கு வந்த குழந்தைகளிலிருந்து அலசி, அலசித் தேர்ந்தெடுத்த 5 குழந்தைகள் போட்டி போடுகின்றன. அவர்கள் வந்த புதிதில் ஏதோ சினிமாப்பாட்டு பாடத்தெரியும் என்ற அளவில் வந்து இன்று மெல்லிசையின் நுணுக்கங்களை தேர்ந்து கற்று சிறப்பான பாடகர்களாக பலர் மிளிர்வது ப்போட்டியின் வெற்றியைச் சுட்டுகிறது.

பாடும் குழந்தைகள் என்றில்லை கேட்கும் நமக்கும் இசை ஞானம் மெல்ல, மெல்ல வளர்வதைக் காண்கிறோம்.

மெல்லிசை என்பது சாஸ்திரீய சங்கீதத்தின் குறள் வடிவம் என்று சொல்லலாம். அடிப்படையில் தமிழ் மெல்லிசை கர்நாடக இராகங்களை அடிப்படையாகவும், பல்வேறு விகிதங்களில் ஹிந்துஸ்தானி, மேல்நாட்டு இசை, நாட்டுப்பாடல், கானா, குத்துப்பாடல்கள் போன்றவைகளின் கலவையாக மிளிர்கிறது.

உலகம் எவ்வளவு சுருங்கி தமிழ்நாட்டில் உருவான இசை உலகளவில் பெரும் தாக்கத்தை உருவாக்கியுள்ளது என்பதற்கு, இசையை முறையாகக் கற்காத தனுஷ் என்ற நடிகரும், ஒரு இளைய இசையமைப்பாளரும் உருவாக்கியளித்த, ‘வொய் திஸ் கொலவெறி டீ?’ என்ற பாடலே சாட்சி.

Dhanush - www.sensongs.com - Why This Kolaveri Di


இப்பாடலின் தாக்கம் ஏன் உலகளவில் இருக்கிறது? என்பது பற்றிய ஆய்வெல்லாம் நடக்கும் அளவிற்கு மெல்லிசை இன்று உலக ஸ்தானத்தை எட்டிப் பிடித்துவிட்டது. எனவே சுப்பர் சிங்கர்ஸ் 3 என்பது சும்மா சினிமாப்பாட்டை மனப்பாடம் செய்து ஒப்பிப்பது அல்ல.

குரலறிஞர் ஆனந்த் வைத்யநாதன் எப்படி இக்குழந்தைகளை மெருகேற்றுகிறார் என்பதைக் குழந்தைகளும், பெற்றோர்களும் சொல்லும் புகழாரம் சுட்டுவது போல் அவர் தரும் அருமையான விளக்கங்கள் மெல்லிசை என்பது முன்பு மக்கள் நினைத்தது போன்ற சாதாரணச் சரக்கு அல்ல என்பதை விளக்கும்.

இந்த மெல்லிசையை சமகாலத்தில் ஹாலிவுட் அளவிற்கு இட்டுச் சென்றவர் ஏ.ஆர்.ரகுமான் அவர்கள். அவரது நெறியாள்கையில் பாடிய அனைவரும் சொல்வது, தாங்கள் பாடும் போது அறியாத ஓர் அற்புத இசை இறுதியாக அவரது சேர்க்கையில் உருமாறி வந்துவிடுகிறது என்பதுதான். ஒரு மந்திரவாதி என்றே நித்யஸ்ரீ சொல்கிறார். இந்த இசை வித்தகர் பாடல்களை பழைய மகாதேவன் பாடல்கள் போல் அவ்வளவு எளிதாக மேடைகளில் பாடிவிட முடிவதில்லை. காரணம் அவ்வளவு நுணுக்கங்களை அந்த 3 நிமிடப்பாடலுக்குள் வைக்கிறார்.

ஏ.ஆர்.ரகுமான் சுற்றில் பாடி, சாக்லெட் மழை பெற்றவர் சுகன்யா எனும் 14 வயது சிறுமி. அவரது பாடல் இதோ:



Airtel Part 4 von vijayred

இவருக்கு சரியான போட்டியளிப்பர் அமெரிக்காவிலிருந்து வந்து இறங்கியிருக்கும் பிரகதி எனும் பெண். அவளது பாடல் இதோ!


Airtel Part 2 von vijayred

மேலும்..தொடர்ந்து பேசுவோம்....

நிர்குணம்


சகுண பிரம்மம், நிர்குணபிரம்மம் என்பது அடிக்கடி காதில் விழும் வார்த்தைகள். இறைவனை நிர்குணனாகக் காண்பதே முறை. அவனுக்குக் குணங்கள் இருப்பது போல் காட்டுவது கற்பிதம் என்பது போல் பேசக்கேட்டிருக்கிறேன். அதே நேரத்தில் இப்படிப் பேசுவோரே பஜனை, உற்சவமென்றால் வரிந்து கட்டிக்கொண்டு கலந்து கொள்வதையும் கண்டிருக்கிறேன். கோயிலுக்குப் போனால் ஒரு சந்நிதி விடாமல் (சண்டிகேஸ்வரர் உட்பட) வழிப்பட்டு, ஸ்வாமிக்கு ஒன்று, அம்பாளுக்கு ஒன்று என்று அர்ச்சனை செய்துவிட்டு வருவதையும் காண்கிறேன். இறைவன் குணமற்றவன் எனில் ஸ்வாமி ஏது? அம்பாள் ஏது? சண்டிகேஸ்வரர் ஏது? பூஜை புனஸ்காரம் எதற்கு? பஜனை எதற்கு? உற்சவம் எதற்கு? இவையும் கற்பிதமா? பரபிரம்மம் நிர்குணம் எனில் இந்த வாழ்வே கற்பிதமா?

இதெல்லாம் கூடப்பரவாயில்லை, பரபிரம்மம் நிர்குணம் என்று சொல்வோர் கடவுள் இல்லை என்று சொல்வதையும் ஏற்றுக்கொள்ள வேண்டிய கட்டாயத்திற்கு வருகின்றனர். நிர்குணம் என்றால் இல்லை என்றுதானே பொருள். அப்படியெனில் நிர்குணம் என்போர் நாஸ்திகர்கள் என்று விளங்கிக்கொள்ள வாய்ப்புள்ளது. ஏதடா! பெரிய வம்பாய் போய்விட்டதே! என்று நினைத்தேன்.

பின் யோசித்ததில் நிர்குணம் என்பதை அப்படிப் புரிந்து கொள்ளுதல் தவறு என்று உணர்ந்தேன். சூரிய ஒளி வைரக்கல்லில் பட்டு, நிறப்பிரிகையாகி வர்ணஜாலங்களில் ஜொலிக்கிறது. ஆனால் அதே வர்ணங்கள் வெள்ளை எனும் ஒரு வர்ணத்தில் அடங்கவும் செய்கின்றன. 3000 வருடங்கள் வாழக்கூடிய பெரிய மரங்கள் உலகில் உள்ளன. ஆனால் அவை விதையாய் இருக்கும் போது ‘இத்துணூண்டாக உள்ளன. ஒரு சிறிய விதைக்குள் ஒரு ஆலமரமே உட்கார்ந்து கொண்டுள்ளது. எனவே விதையை மரமில்லை என்று சொல்லமுடியாது. விதைதான் மரம். ஆனால் அடங்கி இருக்கிறது. வாமனனாக இருக்கும் போது இறைவன் தன்னை அடக்கி வைத்திருக்கிறான். பெருக்கும் போது விராட் புருஷனாக அகிலம் அளக்கிறான்!

அப்படியெனில் நிர்குணம் என்பது குணமற்ற தன்மையன்று. குணங்கள் பரிமளிக்காதநிலை என்று பொருள். ஒருவன் தெருவில் நின்று கொண்டு இறைவன் நிர்குணன் எனவே ‘கடவுள் இல்லை’ என்கிறான். கடவுள் ‘இல்லை’ என்று ‘ஒருவன்’ சொல்லும் வரை கடவுள் உள்ளார் என்று பொருள் கொள்ளலாமே! இருப்பதைத்தானே ‘இல்லை’ என்று சொல்லமுடியும்? இல்லாததை ‘இல்லை’ என்று எப்படிச் சொல்லமுடியும்? [இல்லை என்று சொல்ல ஒருவன் தேவைப்படுகிறதே!] எனவே நிர்குணம் என்று சொல்லை நிர்மாணிக்கவே ‘குணம்’ தேவைப்படுகிறது. எனவே நிர்குணம் என்பதும் அவனது கல்யாண குணங்களில் ஒன்று என்று கொள்வதே சாலப்பொருந்தும். திருவரங்கனைப்பற்றிப்பேசும் ‘ஸ்ரீரங்கநாத கத்யத்தில் ஸ்ரீராமானுஜர் இறைவன் ‘குணகணம்’ என்கிறார். கட்டுக்கட்டாக அவனது குணங்கள் மண்டிகிடக்கின்றனவாம். இறைவனது குணங்களை யாரறிந்து சொல்ல வல்லார்? கட்டுக்கடங்காத குணக்கள் உடையவன் அவன். நிர்குணம் என்பதும் அதிலொன்று. இப்படி எடுத்துக் கொள்ளமுடியுமா? என்று கேட்டால், அப்படிப்பார்ப்பதே உசிதம் என்று சொல்கிறது திருவாய்மொழி!

உளனெனி லுளனவ னுருவமிவ் வுருவுகள்
உளனல னெனிலவன் அருவமிவ் வருவுகள்
உளனென விலனென விவைகுண முடைமையில்
உளனிரு தகைமையொ டொழிவிலன் பரந்தே.

ஸ்ரீ காஞ்சி பிரதிவாதி பயங்கரம் அண்ணங்கராசாரியார் எழுதிய விளக்க உரை

(உளனெனில் அவனுருவம் இவ்வுருவுகள்; உளனலனெனில் அவனருவமிவ்வருவுகள்.) ஈச்வரனுக்கு உளனாயிருக்குந் தன்மையாவது ஸ்தூலரூபத்தோடுகூடிய சேதநாசேத்நங்களைச் சரீரமாகவுடையனாயிருக்குந் தன்மையேயாம். இனி, இலனாயிருக்குந் தன்மையாவது ஸூக்ஷ்மரூபத்தோடு கூடிய சேதநாசேதநங்களைச் சரீரமாகவுடையனா யிருக்குந்தன்மையேயாம். உபநிஷத்தில் *அஸத் வா இத மக்ர ஆஸீத்* என்று ஓதப்பட்டுள்ள இடங்களில் ஸூக்ஷ்மசிதசித் சரீரகத்வமே அஸதத்வம் என்று நிர்ணயிக்கப்படுவதாகத் தேறுதலால் அதனை அடியொற்றி ஆழ்வார் உள்ளனவெனில் அவனருவமிவ்வருவுகள் என்றருளிச்செய்தாரென்க. ‘ஈச்வரனுண்டு என்றால் ஸ்தூலரூப ப்ரபஞ்ச விசிஷ்டத்வம் விவக்ஷிதம்; ‘ஈச்வரனில்லை’ என்றால் ஸூக்ஷ்மரூப ப்ரபஞ்ச விசிஷ்டத்வம் விக்ஷிதம்; ‘ஈச்வரனில்லை’ என்றால் ஸூக்ஷ்மருப ப்ரபஞ்ச விசிஷ்டத்வம் விசக்ஷிதம்; ஆக இவ்விரண்டு வகைதவிர அடியோடு சூந்யத்வமென்பது எவ்வழியாலும் ஏற்படாதென்றதாயிற்று.

பின்னடிகளின் கருத்தாவது உளன் என்ற ப்ரதிஜ்ஞையாலே உண்மை ஏற்படுகிறது; இலன் என்ற ப்ரதிஜ்ஞையாலே இன்மை ஏற்படுகிறது. உண்மையாவது அஸ்தித்வம்; இன்மையாவது நாஸ்தித்வம்: இவ்விரண்டு தருமங்களும் ஒரு பொருளை ஆச்ரயித்தேயிருக்க வேண்டுதலால் நாங்கள் சொல்லுகிற அஸ்தித்வத்திற்கு ஆச்ரயமாகவும், நீ சொல்லுகிற நாஸ்தித்வத்திற்கு ஆச்ரயமாகவும் ஒரு வஸ்து தேறும்? என்று ஆக்ஷேபிக்க முடியாது; ஏதோவொரு வஸ்துவைச் சுட்டித்தானே நாஸ்தி யென்னவேண்டும்; அப்படி நாஸ்தி என்று நீ சொல்லுகிற வஸ்து எது? என்று கேட்டால் அப்போது அதனை நீ நிரூபித்தேயாக வேண்டுமே; ஆனது பற்றியே நாஸ்தித்வத்திற்கு ஆசரயமாகவும் வஸ்துவினுண்மை ஸித்தித்தே தீருமென்கிறோம். அப்படி ஸித்திக்குமாதலால் ஸர்வதேச ஸர்வகால வ்யாபியான எம்பெருமான் ஸவிபூதிகனாய் ஸித்தித்தானாயிற்று என்றதாம்.

English Translation

Would you say he is, then he is, and all this is him. Say he is not, then too he is, as the formless spirit in all. With the twin qualities of being and non-being, he pervades all things and places forever.

இப்படி விளங்கிக்கொண்டால்தான் இப்பிரபஞ்சத்தை நாம் புரிந்து கொண்டவராவோம். ஒன்றுமேயில்லாத சூன்யத்திலிருந்து ஒன்று பிறக்காது. எல்லாம் அடங்கிய ஒன்றிலிருந்து பல பிறக்க சாத்தியமுண்டு. ‘உலகமுண்ட பெருவாயா’ என்பதும், உலகமுண்டு ஆலிலையில் ஓர் குழந்தை தவழ்கிறது என்பதும் இதைச் சுட்டவே! இறைவனை வேற்று மதத்தினர் யாரும் ‘குழந்தையாக’ பார்ப்பதாகத் தெரியவில்லை. ‘குழந்தை’ என்றால் ‘வித்து’ என்று பொருள்.

இதைத்தான் Powers of Ten எனும் விழியம் விளக்குகிறது:

பொதுமகளிர் குறித்த விவேகாநந்தரின் நிலைப்பாடு

உணவு என்பது இந்தியதியத்தத்துவ மரபையும், அதன் சமூகப்படிநிலைகளையும் தீர்மானிக்கிறது. என்று பார்த்தோம்.

பசிக்கு அடுத்தது ‘கிசி’. உடற்பசியைக் ‘கிசி’ என்கிறார், கி.இராஜநாராயணன். உடற்பசி இல்லாத உயிரினமே கிடையாது. அதன் மூலமாக உயிர்கள் தன் இருப்பைத் தக்க வைக்கின்றன. இந்தக் கிசி என்பதைப் பிற உயிர்கள் மிக இயல்பாக எடுத்துக்கொண்ட போது மனிதன் மட்டும் அதையொரு சமூக, அரசியல், ஆன்மீக ஆயுதமாகப் பயன்படுத்தத் தொடங்குகிறான். பெண்களுக்கு இயல்பாக இரண்டு பெரிய வரங்கள் கிடைத்துள்ளன. ஒன்று ‘காமரூபிணி’யாக இருப்பது. அதன் மூலமாக பிள்ளைப்பேற்றைப்பெற்று உயிர்களை வாழவைப்பது. பிறந்த குழந்தைக்கு தாய்ப்பால் இல்லையெனில் இறந்துவிடும். தாய்ப்பாலில் கிருமிகளை எதிர்க்கும் சக்தி உள்ளது. இந்த இரண்டு செயல்களும் ஆண்களுக்குக் கொடுக்கப்படவில்லை. எனவே மனித சமூகத்தில் ஆணாதிக்கம் தலைப்பட்ட போது இந்த இரண்டு வரங்ளையும் சாபமாக்கிவிட்டான் மனிதன். ‘காமம்’ என்பது கீழ்த்தரமானது என்றும். படைக்கும் திறனுள்ள மனைவி கணவனுக்கு அடிமை செய்ய, அவன் இச்சைகளைப் பூர்த்தி செய்யப் பிறந்தவள் என்றும் மாற்றிவிட்டான். இராமகிருஷ்ணப் பரமஹம்சருக்கு ‘கிசி’ தோன்றவில்லையே என்று ஒரு விலை மகளை ஏற்பாடு செய்வதாக இராமகிருஷ்ண வைபவம் சொல்கிறது.

  After the vision, Ramakrishna surrendered himself to Kali. Childlike, he obeyed what he called the will of the Mother Kali in everything, no matter how trivial or philosophical. Although Rani Rasmani and her son-in-law Mathur Babu had faith in Ramakrishna and left him free do whatever he liked, they thought that Ramakrishna was suffering from the effects of unduly prolonged continence. So Mathur arranged for prostitutes to visit Ramakrishna, but their attempts to seduce Ramakrishna only failed. 

விவேகாநந்தரிடம் விலைமகளிரை கோயிலுக்குள் அனுமதிக்கலாமா? என்று கேட்டபோது மிகவும் கொதித்துப்போகிறார்.

  I bequeath to you, young men, this sympathy, this struggle for the poor, the ignorant, the oppressed. Go now this minute to the temple of Parthasarathi, and before Him who was friend of the poor and lowly cowherds of Gokula, who never shrank to embrace the pariah Guhaka, who accepted the invitation of a prostitute in preference to that of the nobles and saver her in His incarnation as Buddha - yea, down on your faces before Him and make a great sacrifice, the sacrifice of a whole life for them, for whom He comes from time to time, whom He loves above all, the poor, the lowly and the oppressed. Thus Spake Vivekananda

 மிக, மிக அழகாக எடுத்துச் சொல்கிறார். நீர்மை என்பதே அவதாரமாகக் கொண்ட கிருஷ்ண, புத்தச் சரிதங்களை மேற்கோள் காட்டுகிறார். மேலும் இது குறித்து விரிவாகவே பேசுகிறார்:

  1. If public women are not allowed to go to such a great place of pilgrimage as Dakshineswar, where else shall they go to? It is for the sinful that the Lord manifests Himself specially, not so much for the virtuous. 
 2. Let distinctions of sex, caste, wealth, learning, and the whole host of them, which are so many gateways to hell, be confined to the world alone. If such distinctions persist in holy places of pilgrimage, where then lies the difference between them and hell itself? 
 3. Ours is a gigantic City of Jagannâtha, where those who have sinned and those who have not, the saintly and the vicious, men and women and children irrespective of age, all have equal right. That for one day at least in the year thousand of men and women get rid of the sense of sin and ideas of distinction and sing and hear the name of the Lord, is in itself a supreme good. 
 4. If even in a place of pilgrimage people's tendency to evil be not curbed for one day, the fault lies with you, not them. Create such a huge tidal wave of spirituality that whatever people come near will be swept away. 
 5. Those who, even in a chapel, would think this is a public woman, that man is of a low caste, a third is poor, and yet another belongs to the masses — the less be the number of such people (that is, whom you call gentlemen) the better. Will they who look to the caste, sex, or profession of Bhaktas appreciate our Lord? I pray to the Lord that hundreds of public women may come and bow their heads at His feet; it does not matter if not one gentleman comes. Come public women, come drunkards, come thieves and all — His Gate is open to all. "It is easier for a camel to pass through the eye of a needle than for a rich man to enter the Kingdom of God." Never let such cruel, demoniacal ideas have a place in your mind.

 //Those who, even in a chapel, would think this is a public woman, that man is of a low caste// எனும் விவேகாநந்தரின் பாவத்தை திருமாலை எனும் பிரபந்தத்தில் விப்ரநாராயணன் என்ற அந்தணரும் சொல்கிறார்.

அமரவோ ரங்க மாறும் வேதமோர் நான்கு மோதி 
தமர்களில் தலைவ ராய சாதியந் தணர்க ளேலும் 
நுமர்களைப் பழிப்ப ராகில் நொடிப்பதோ ரளவில்ஆங்கே 
அவர்கள்தாம் புலையர் போலும் அரங்கமா நகரு ளானே.

பொருளுரை:

ருக்கு, யஜூஸ், ஸாமம், அதர்வணம் என்று வேதங்கள் நான்கு; சீக்ஷை, வியாகரணம், சந்தஸ், நிருக்தம், ஜியோதிஷம், கல்பம் என்று வேதாங்கங்கள் ஆறு; இவற்றை யெல்லாம் கண்டபாடம் பண்ணி அவற்றின் பொருள்களையும் அறிந்து, அவ்வறிவுக்குப் பலனாக பகவத் கைங்கர்யத்தில் முதன்மையாக ஊன்றியிருக்கும் சிறந்த அந்தணர்களா யிருந்தபோதிலும் அவர்கள், கீழ்க்கூறிய யோக்யதைகளெல்லாமில்லாமல் கேவலம் பகவத்தைங்கர்ய மொன்று மாத்திரமுடைய ஒரு ஸ்ரீவைஷ்ணவரை (அதாவது சண்டாளஜாதியிலே பிறந்தவரை) அந்தப் பிறவியைப் பற்றி இகழ்வாக நினைத்து தூஷிப்பார்களானால் தூஷிக்குமவர்கள் தாங்களே ப்ராஹ்மண்யம் கெட்டுக் கர்மசண்டாளராயப் போவர்கள். இப்படி போவது ஜந்மாந்தரத்திலோ வென்னில்; அன்று தூஷித்த அந்த க்ஷணத்திலேயே சண்டாளராயொழிவர்.

English Translation

 What though they study the six Angas, and the four Vedas, rank ahead of all, and pride themselves in their Andanar lineage, if they but speak ill of your devotees, that very moment, right there, they become worse than the Pulaiyar. O Lord of Arangama-nagar!

 பண்டைய மனோபாவம் இன்னும் முழுமையாய் மாறாத நிலையில் நாம் இன்னும் அரசியல் நடுவுநிலைமையின்றி பெண்களைக் கேவலமாகப்பேசும் ஒரு ஆன்மீக நோக்குடன்தான் செயல்படுகிறோம். மேலை உலகில் ஒருவரின் பால், அவரின் பாலியல் நோக்கு (sexual orientation) இவை தடையாக இருத்தல் கூடாது என்ற பொது நிலைப்பாடு வந்து கொண்டு இருக்கிறது. ஆம்ஸ்டர்டாம் போன்ற பெரு நகரங்களில் விலைமகளிர் மிக ஆரோக்கியமான சூழலில், மருத்துவக் காப்பீட்டு உதவியுடன் செயல்படுகின்றனர் அங்கு கணிகையர் நாகரீகமாக நடத்தப்படுகின்றனர். ஆண்களுக்கு உதவி செய்யும் தொழிலாக அது பார்க்கப்படுகிறது. பாரதி இதைச் சுட்டிப்பேசும் போது ஆண்களுக்கு இச்சை வரவில்லையெனில் பொதுமகளிர் எங்கிருந்து உருவாகுவர் என்று கேட்கிறான்.

 எனவே வேறு எங்கு பாசாங்குத்தனம் அனுமதிக்கப்படுகிறதோ இல்லையோ, ஆன்மீகத்தில் பாசாங்கிற்கு இடமே இல்லை என்று கூறலாம்.

இறைமைக்கிட்டுச்செல்லும் இராப்பொழுதுகள்


இரவுகள் ஏன் தோன்றின?

பிரபஞ்சம் மிகப்பெரியது. எத்தனையோ விண்மீன் மண்டலங்கள். அதில் சூரிய மண்டலமொன்று. அதில் 9 கிரகங்கள். அதில் பூமியும் ஒன்று. பூமி தன்னைச் சுற்றிக்கொள்வதுடன், சூரியனையும் சுற்றுகிறது. இச்சுழற்சியால் இரவு பகல், பருவகாலங்கள் வருகின்றன. இந்த இரவு பகல் எனும் சுழற்சி உயிர்களின் ஸ்தியை உறுதிப்படுத்துகின்றன. இரவு, பகல் எனும் திட்டம் (pattern) இல்லையெனில் வாழ்வு வித்தியாசமாக இருந்திருக்கும். நிலா கூட பூமி போல் சுற்றுவதில்லை. அதன் ஒரே முகத்தையே நமக்குக் காட்டிக்கொண்டுள்ளது. ஆனால் பூமியில் ஒரு பொழுது முழு இரவு, மறுபொழுது முழுப்பகல். பகலில் வெளிச்சம். இரவில் இருள். இவைதான் நம் ஜீவனம்.

நேற்றிரவு ஒரு கனவு. கனவுகளை உருவாக்குபவர் யார் என்று தேடிக்கொண்டிருக்கிறேன்! நான் தெருவில் நடமாடிக்கொண்டிருக்கும் போது நாலைந்து பேர் என்னைச் சூழந்து கொள்கின்றனர். அவர்களது கெட்ட நோக்கம் விரைவிலேயே தெரியவருகிறது. அவர்கள் என் பங்காளி அனுப்பிய அடியாட்கள். என்னை அடித்துத்துன்புறுத்தி என் சொத்து, பத்தை எழுதிவாங்க வைக்க வந்திருக்கிறார்கள். எப்படித்தெரிந்தது எனில், திரும்பிய ஒரு பொழுதில் என் பங்காளியும் இக்கூட்டத்தில் இருப்பது தெரிந்தது. பின் தமிழக ஹீரோ மாதிரி சண்டை போட்டு கூட்டத்தை விரட்டினேன் என்று எண்ணாதீர்கள் ;-) வாய்ச்சவுடாலால் என்னவோ பேசி அவர்களை விரட்டுகிறேன். ஏதோ சமாதானம் சொல்லி அவர்களும் நகர்கின்றனர். ஆனால் அந்த உயிருக்குப் பயந்த பொழுதுகள் ஆழமான அதிர்வலைகளை என்னுள் உருவாக்கின. நிஜமாக நடப்பது போலிருந்தது. திடுக்கிட்டு விழித்த பின் ஆறுதலாய் இருந்தது. எனக்கு பங்காளி உண்டு. இருந்த ஒரு வீடும் பகிர்ந்து கொள்ளப்பட்டு வருடங்களாகின்றன. ஆனால், திடீரென்று இப்படியொரு கனவு. எனக்குள் கனவு நெறியாள்கை யார் என்று தெரிவதில்லை. சும்மா சொல்லக்கூடாது! சூப்பரா பண்ணியிருப்பார். காட்சிகள் தத்ரூபமாய் அமையும் ;-)



இரவில் ஒரு சிறுதுளி பயம், பிரம்மாண்டமாகிறது. பெரிய கோயிலுள் எழுப்பும் சிறு ஒலி (கைதட்டல்) பெரிதாவது போல், நம் மனதின் சிறு பயம் இரவில் பூதாகரமாகிறது. முன்னொருகாலத்தில் இரவு என்பது மிகவும் பயங்கரமானது. துஷ்ட மிருகங்கள் வந்து நம்மைத்தின்று போகலாம். பின் எரிநெறுப்பு, வீடு, குடும்பம், கிராமம், நகரம் என்று வந்த பின் நாம் மிகப்பாதுகாப்பாக உள்ளோம். ஆயினும் ஆதி மனது, ஆதியாகவே உள்ளது. நம் பரிணாம வளர்ச்சியை உருவாக்கிய காரணிகள் அப்படியே நிலைபெற்றுவிட்டன. மனிதனுள் ‘பயம்’ என்பது இல்லையேல் ‘இறைவன்’ பற்றிய கருத்தாக்கம் தோன்றியிருக்க வாய்ப்பில்லை என்று தோன்றுகிறது! பயப்படும் போது துணை தேவையாய் உள்ளது. ‘தெய்வம் நமக்குத்துனை பாப்பா! ஒரு தீங்குவரமாட்டாது பாப்பா! என்கிறான் பாரதி, குழந்தைகளிடம்.

எனவே இரவு/பகல் என்ற இந்த சுழற்சி அமைப்பே இறைவனை நமக்குக்காட்டத்தானோ என்று தோன்றுகிறது. இரவு, பகல் இல்லாத உலகங்கள் உண்டா என்று தெரியவில்லை. அங்கு தெய்வ நம்பிக்கை இருக்குமா? என்பதும் தெரியவில்லை. நமக்குத்தெரிந்து இந்தப் பிரம்மாண்ட பிரபஞ்சத்தில் இருப்பது ஒரு பூமி. அந்தப் பூமி சுழல்கிறது. சூரிய ஒளி படும் நேரம் பகலெனப்படுகிறது, சூரிய ஒளியற்ற பகுதி இரவு எனப்படுகிறது. இரவின் தோற்றம் ஏனென்று கேட்டுப்பார்த்தால் இறைவன் உள்ளான் என்று காட்டுவதற்குத்தான் என்றொரு பதில் வந்தது! கவிதையாய்!!

இரவுகள் ஏன் தோன்றின?

அரவமில்லாக் காட்டில்
பரபரக்க நகரும்
உருவமில்லா
நிழல்களின்
உரசல் ஒலிகூட
உறைக்க வைத்து
மறைந்து சாகும்.

மோனத்துயில் கொள்ளும்
தூரத்து பொய்கையில்
விழுந்து தவழும்உதிர் இலை கூட
ஒரு கணம் விதிர்க்க வைத்து
விந்தை செய்யும்.

யாருமில்லா வீட்டினுள்
தனிமையில் ஒழுகும்
குழாயின் சொட்டொலி
இடிக்கும் மேகத்தை
இருளில் அழைத்துவரும்.

இரவு தனிமை
இரவு மோனம்
இரவு ஆழம்

இரவு இல்லையேல்
இறைமையும் இல்லை


கடல்வெளி - The Inner Space of Kasumi Chan

உருமி - திரைப்பார்வை

உருமி என்றொரு படம் வந்திருக்கிறது, ‘உடனே பார்!’ என்றொரு அசரீரி! இங்கு அசரீரி என்பதை ஏதோ நண்பர் எப்போதோ கூற எந்த நண்பர் எப்போது கூறினார் என்பது மறந்து போன நிலையில் அது ‘அசரீரி’ ஆகிவிடுகிறது எனக்கொள்க ;-)


யார், யார் நடித்தது, ஏன் பார்க்க வேண்டுமென்ற எந்த விவரமும் இல்லாமல் வேறு எங்கோ பிராக்குப் பார்த்துக் கொண்டிருக்கும் போது உருமி கண்ணில் சிக்கியது. தட்டினால் பிரபு தேவா! சரி சுவாரசியமாக இருக்குமென்று பார்க்க ஆரம்பித்தேன். ஆரம்பம் படு ஜோர்! அழகு, அழகுப் பெண்கள்! மலையாளத்தில்


கதை நடக்கிறது. எனவே கேரளத்து அழகு! அரக்கல் ஆயிஷா என்று கலப்பினப் பெண் வேறு கண்களுக்குக் குளுமையூட்ட! இவர் உண்மையான பெயர் Genelia D’Souza என்பது. அதுவே ஒரு போர்த்துக்கீசியப்



பெயராக உள்ளது! கதையும் ஒரு வகையில் போர்த்துக்கீசியக் கதைதான். வாஸ்கோடகாமா மிளகு வாங்க வந்து நாட்டைப்பிடிகின்ற கதை! பின் வித்யா பாலா என்ற அழகி வேறு! கண்ணிற்கு இளமை விருந்து!


கேமிராவும் படப்பிடிப்பும் மேலைப்படங்களுக்கு ஒப்ப என்றால் மிகையில்லை. பெரிய தியேட்டரில் பார்ப்பது ஒரு அனுபவமாக இருக்கும்! அழகு மட்டும் போதுமா? கூடவே வன்முறையும் வேண்டுமே! அது நிறைய்ய இருக்கிறது.

சினிமா என்பது நமது புராணங்கள் போல. அதில் உண்மை எங்கோ ஒட்டிக்கொண்டிருக்கும். மிச்சமிருப்பதெல்லாம் கற்பனைதான்! வாஸ்கோடகாமா பற்றி இப்படியெல்லாம் கதை இருப்பதை நான் அறியேன். ஆயினும் ஒரு குறியீட்டளவில் இப்படம் வெற்றியே பெற்றுள்ளது. ஒரு காலத்தில் உண்மையாய் அடிமை ஆனோம். இப்போது பொருளாதாரப்பின்னலில் அடிமை ஆகிறோம் என்கிறது படம். சர்வதேச வியாபாரம் என்பது பொருளாதார அடிமைகளை, காலனிகளை உருவாக்கிய வண்ணமே உள்ளது என்பதன் அடிப்படையில் அமைகிறது படம். 

இது முதலில் மலையாளத்தில் வந்திருக்கிறது. இசை அற்புதம்! தீபக்தேவ் என்பவர் ஹாலிவுட் படத்திற்கு இசையமைக்க வேண்டியவர். என்ன நேர்த்தி! படத்தில் வசனம்தான் உதைக்கிறது. அதுவும் இந்த ஆர்யா பேசும் தமிழ்! அதுசரி, அந்தக்காலத்துப்படமென்றாலே எழுத்துத்தமிழில்தான் பேச வேண்டுமென்ற நியதியா? யார் போட்ட பாடமிது? வீரமாமுனிவர் காலத்தில் விவிலியத்தை பேச்சுத்தமிழில் எழுத வேண்டுமா? செந்தமிழில் எழுத வேண்டுமா? என்ற விவாதம் நடந்திருக்கிறது. மலையாளம் கலந்த பாலக்காட்டுத்தமிழே தேர்வாகியிருக்க வேண்டும். பொருத்தமாக இருந்திருக்கும். பிரபுதேவா தமிழ் பேசும் போதும் கேட்க முடியவில்லை! இப்படத்தில் பிரபுதேவா anyway waste!

மலையாளம், தெலுங்கு மற்றும் தமிழ் பேசிவிட்ட உருமி விரைவில் ஆங்கிலம் பேச இருக்கிறது. இந்தப் படத்தின் தொலைக்காட்சி உரிமையை ஜப்பான் வாங்கியிருப்பதே உருமியின் வெற்றிக்குச் சான்று. படத்தின் முக்கியத்துவம் சிதைந்து விடாமல் தமிழில் கலைப்புலி எஸ் தாணு தயாரித்து வெளியிட்டிருப்பது போன்று ஹிந்தியில் யாராவது முன்வந்தால் நிச்சயம் ஹிந்தியிலும் உருமி வெளியாகும்… இன்னும் பத்து வருடம் கழித்துப் பார்த்தாலும் புதிதாகத் தெரியும் அளவிற்கு காட்சிகளை அமைத்திருக்கிறார் இயக்குனர் சந்தோஷ் சிவன் என்று கூறுகிறார் ப்ருத்விராஜ்!

எனக்குப் பிடித்தவர் மால்குடி சுபா! வித்தியாசமான கலைஞர். இவர் பாடியிருக்கும் ‘சலனம், சலனம்’ பாடலும் சரி, அதைப்படமாக்கியிருக்கும் விதமும் சரி! படத்தின் உச்ச வெற்றியென்றே கூற வேண்டும். இப்படத்தின் அனைத்துப்பாடல்களையும் கேட்க!


ஆனாலும் இந்த உருமி என்ற ஆயுதம் திடீரென்று விஸ்வரூபமெடுத்திருப்பதற்குக் காரணம் நேஷனல் ஜியாகிரபிஃக் ஹ்ஸ்டரி சேனலில் இது பற்றிய ஒரு ஆவணம் வந்ததுதான். அந்த ஆயுதத்தால் ஒரே வீச்சில் 9 பேர் தலையை உருவமுடியும். ஆனால் படத்தில் அதன் முழு பலத்தையும் காட்டவில்லை என்றே சொல்ல வேண்டும்! நம்மிடம் உள்ளதை நாம் அறிந்து கொள்ளவும் நாம் வெள்ளைக்காரர்களை நம்பி இருப்பது இப்படம் சொல்ல வரும் கருத்திற்கு முரணாக அமையவில்லையா? எல்லாம் ஹாலிவுட் சொன்னபின்னால்தான் என்றால் எப்படி?



இளையராஜாவின் வேறொருமுகம்!

இளையராஜா என்றவுடன் நமக்கு பச்சை வயல்களும், பாவாடை தாவணிக் கனவுகளும், பண்ணையார்களும்தான் ஞாபகத்திற்கு வருவர். ஆனால் இந்த பிம்பத்திற்கு நேர் எதிரான ஒரு நிகழ்ச்சியை இளையராஜா இத்தாலியில் நடத்தியுள்ளார். இவரது நிகழ்ச்சியின் ஆரம்பமே ஹிந்துஸ்தானி இசையில் தொடங்குகிறது! அதுவும் இவரது இசையமைப்பு என்று சொல்லமுடியாது. காலம் காலமாக உள்ள ஹிந்துஸ்தானி இசையது. சரி அடுத்த பாடல்? கர்நாடக சங்கீதம். அதுவும் கேரளத்தவர் பிரபலப்படுத்திய கீர்த்தனை. அதுவும் இவர் இசை கிடையாது. காதல் கீதம் எனும் போது இவர் ஞாபகத்திற்கு வருவது யார்? சங்கர் ஜெய்கிஷான்!! ஏன் தமிழர்கள் விரும்பும் எத்தனையோ காதல் பாடல்களை இவர் அமைக்கவில்லையா? மருந்திற்கும் ஒரு தமிழ் பாடல் இல்லாத ஒரு நிகழ்ச்சியை இளையராஜா இத்தாலியில் கொடுத்துள்ளார். அதுதான் போகிறது என்றால் இசை அமைப்பு இளையராஜா என டைட்டிலில் போட்டிருந்தாலும் ந்கழ்ச்சியை நடத்திக்கொடுப்பவர் உத்தம் சிங்.



இவரது பெண்ணை வெளிநாடு காட்ட அழைத்து வந்திருக்கார் போல! பவதாரிணி ஏதோ சின்ன தாலாட்டுப் பாட்டுப்பாடுகிறார். இளையராஜா ரசிகர்களுக்கு அவரை டாக்டர் என்று அழைப்பதும், பேண்ட் சூட் போட்டுப் பார்ப்பதும் ஒரு கிக் தரலாம். அவ்வளவுதான். இளையராஜாவின் முத்திரை எனும் தமிழிசை மருந்திற்கும் இல்லாத ஒரு நிகழ்ச்சியை நடத்த இவர் இத்தாலிவரை போயிருக்க வேண்டியதில்லை. இதை எந்த இசைக்குழுவும் நடத்தும். எல்லார் காதுகளிலும் அது என்ன ரிகாரிடிங் ஸ்டீடியோவில் உள்ளது போன்ற ஹெட்ஃபோன்? மேலை இசையரங்குகளில் யாரும் இப்படி இசைப்பதில்லை. ஏதோ போனாப்போகுதுன்னு ஒரு கபடி விளையாட்டுப் பாடலொன்று. அதுதான் இளையராஜாவின் கிராமத்து மணத்தை இங்கே காட்டுகிறது!

கங்குலும் பகலும் கண் துயிலறியாள்! பத்மாவும், மீராவும்

கங்குலும் பகலும் கண்துயி லறியாள்
கண்ணநீர் கைகளால் இறைக்கும்
சங்கு சக்கரங்கள் என்றுகை கூப்பும்
'தாமரைக் கண்' என்றே தளரும்
எங்ஙனே தரிக்கேன் உன்னைவிட் டென்னும்
இருநிலம் கைதுழா விருக்கும்
செங்கயல் பாய்நீர்த் திருவரங் கத்தாய்!
இவள்திறத் தென்செய்கின் றாயே?


(திருவாய்மொழி 7.2.1)

கற்றறிந்த பெரியோர் சொல்வர் பக்தி எனும் குழவி தமிழகத்தில் பிறந்து,
கர்நாடகத்தில் தளிர் நடை பயின்று, குஜராத்தில் குமரியாகி, வங்கத்தில்
முதுமை கொள்கிறாள் என்று.

எனவே மீராவின் பா(b)வத்திற்கு முன்னோடி நம்மாழ்வார் என்றாகிறது.

இதோவொரு மிக அற்புதமான நாட்டிய விருந்து. டாக்டர் பத்மா
சுப்ரமணியம் நாட்டிய உலகில் பிரவேசித்த காலங்களின் ஒரு இளம் மானாக,
மயிலாக, அன்னமாக தவழ வந்திருக்கிறார் என்பதை நிரூபிக்கும் ஆவணம்.
அப்போதெல்லாம் கரணங்கள் எவ்வளவு லகுவாகக் கை வந்திருக்கிறது! 


இதோ பத்மா எனும் ஆச்சர்யம்!




தமிழ் வாழ்த்துப்பாடல்கள்

தமிழ் தமிழர்களை இணைக்கும் பாலம். எனவே இம்மொழியை பெண்ணாக உருவகப்படுத்தி வாழ்த்துப்பாடுதல் ஒருமுறை. உருவகப்படுத்தாமல் மொழியை வாழ்த்துவதுமுண்டு. பெ. சுந்தரம் பிள்ளை எழுதிய மனோன்மணீயத்தில் இடம்பெற்ற தமிழ்த் தாய் வணக்கப் பாடலான நீராருங் கடலுடுத்த நிலமடந்தைக் கெழிலொழுகும் என்ற பாடல் தமிழ் நாடு அரசினரால் தமிழ்த்தாய் வாழ்த்துப் பாடலாக ஜூன் 1970 இல் அறிவிக்கப்பட்டது.

தமிழ்நாட்டு வாழ்த்து

நீராரும் கடலுடுத்த நில மடந்தைக் கெழிலொழுகும்
சீராரும் வதனமெனத் திகழ் பரதக் கண்டமதில்
தெக்கனமும் அதில் சிறந்த திராவிட நல் திருநாடும்
தக்க சிறு பிரைநுதலும் தரித்த நறும் திலகமுமே
அத்திலக வாசனை போல் அனைத்துலகும் இன்பமுற
எத்திசையும் புகழ் மணக்க இருந்தபெரும் தமிழணங்கே ! தமிழணங்கே !
உன் சீர் இளமை திறம் வியந்து செயல் மறந்து வாழ்த்துதுமே !
வாழ்த்துதுமே ! வாழ்த்துதுமே !

பொருள்: அலை கடலே ஆடையான இந்த அழகான பூமிப் பெண்ணிற்கு பாரத நாடே முகமாம் தென்திசை அதன் நெற்றியாம் அதில் திலகமென திகழ்வது திராவிட திருநாடாம் அந்தத் திலகத்தின் வாசனைப் போல் அனைத்து உலகமும் இன்பம் காண எல்லா திசையிலும் புகழ் மணக்க இருக்கும் தெய்வமகள் ஆகிய தமிழே என்றென்றும் இளமையாக இருக்கிற உன்னுடைய இந்த அழகைக் கண்டு வியந்து,செய்யும் செயலையும் மறந்து வாழ்த்துகிறோம் வாழ்த்துகிறோம் வாழ்த்துகிறோம்.

இப்பாடலைக் கேட்க இராகா செல்லவும்:

இப்பாடல் மிகத்தெளிவாக இந்தியாவில் இருக்கும் தமிழ்நாட்டைச் சுட்டும் பாடலாக அமைந்துவிடுவதைக் காண்கிறோம். ஆனால் தமிழர்களோ இன்று 22 நாடுகளில் பரந்து விரிந்து வாழ்கிறார்கள். இவர்கள் அனைவரையும் சுட்டும் வரிகள் இப்பாடலில் இல்லை.

தமிழின் பூர்வகுடிகள் இந்தியா, இலங்கை என்ற நாடுகளில் வாழ்ந்து செழித்தார்களெனில் இலங்கை பற்றிய எக்குறிப்பும் இப்பாடலில் இல்லை. எனவே இலங்கை மக்கள் தங்களுக்கென ஒரு தமிழ்மொழி வாழ்த்துச் சொல்வதில் தவறில்லை. அப்படித்தான் அமைகிறது புலவர் சிவநாதனின் ஒரு பாடல்.

சீருடைச் செந்தமிழ் மகள் வாழி! எம்
சிந்தையில் நிறைந்த அவள் வாழி
போருடைப் புறமும் அன்புடை யகமும்
போர்த்த பேரழகாள் புகழ் வாழி!

ஆரமாயியலோடு தேனிசை நாடகம்
அணிந்தவள் சங்கம் தனிலூறிச்
சாரமாய் வடிந்த காவியச் சோலையில்
களி நடம் பயின்றவள் பேர் வாழி!

ஏருடை நிலமுங் காருடை வளமும்
தாருடை அரசும் இல்லாமல்
பாரினில லையுந் தமிழரை யிணைத்தே
வீறுடைச் செல்வியாய் அவள் வாழி

இப்பாடலை இசை அமைத்துப் பாடியுள்ளார் இலண்டனைச் சேர்ந்த மாதினி ஸ்ரீஸ்கந்தராஜா. இப்பாடலை தமிழ் மரபு அறக்கட்டளையின் மண்ணின் குரல் வலைப்பதிவில் கேட்கலாம்!

ஒருகுறையும் இல்லாத ஒரு தமிழ் மொழி வாழ்த்து உருவாக வேண்டும், அது அனைத்துத் தமிழர்களையும், ஏன் இணையத்துத் தமிழையும் உள் வாங்க வேண்டும் எனும் நோக்கில் மலேசிய எழுத்தாளர் சங்கம் பெருமுயற்சி எடுத்து கவிஞர் சீனி நைனா முகம்மதுவைக் கொண்டு ஒரு பாடலை இயற்றியது. இப்பாடலுக்கு இசை அமைத்தவர் ஆர்.பி.எஸ்.ராஜூ, பாடியவர்கள்: துருவன், பாபு லோகநாதன். அப்பாடல் வரிகள்:

நிலைபெறநீ வாழியவே!

காப்பியனை ஈன்றவளே!
காப்பியங்கள் கண்டவளே!
கலைவளர்த்த தமிழகத்தின்
தலைநிலத்தில் ஆள்பவளே!
தாய்ப்புலமை யாற்புவியில்
தனிப்பெருமை கொண்டவளே!
தமிழரொடு புலம்பெயர்ந்து
தரணியெங்கும் வாழ்பவளே!

எங்களெழில் மலைசியத்தில்
சிங்கைதனில் ஈழமண்ணில்
இலக்கியமாய் வழக்கியலாய்
இனக்காவல் தருபவளே!
பொங்கிவளர் அறிவியலின்
புத்தாக்கம் அத்தனைக்கும்
பொருந்தியின்று மின்னுலகில்
புரட்சிவலம் வருபவளே!

செவ்வியலின் இலக்கியங்கள்
செழித்திருந்த பொற்காலம்
சேர்த்துவைத்த செயுள்வளத்தில்
செம்மாந்த பழையவளே!
அவ்வியலில் வேரூன்றி
அறிவுயர்ந்த தற்காலம்
அழகழகாய் உரைநடையும்
ஆளுகின்ற புதியவளே!

குலங்கடந்து நெறிகடந்து
நிலவரம்பின் தடைகடந்து
கோமகளாய்த் தமிழர்மனம்
கொலுவிருக்கும் தமிழணங்கே!
நிலவினுக்கே பெயர்ந்தாலும்
நினதாட்சி தொடருமம்மா!
நிறைகுறையாச் செம்மொழியே
நிலைபெறநீ வாழியவே!

இனிய இப்பாடலைக் கேட்க தமிழ் மரபு அறக்கட்டளையின் மண்ணின் குரல் வலைப்பதிவிற்குச் செல்ல வேண்டும்!:

இந்தியாவிலுள்ள தமிழகம் இனிமேலும் தமிழ் மொழி மீது ஆதிக்கம் செலுத்தும் என நம்ப முடியாது. அங்கு நடக்கும் அரசியல் கோமாளித்தனத்தில் ஒரு முதல்வர் எழுதி, புத்தகங்களில் அச்சிடப்பட்ட செம்மொழிப் பாடலை அடுத்த முதல்வர் வந்தவுடன் கிழித்து விடுகிறார். மேலும் ஈழத்தமிழர்கள் துயருற்ற போது அரசியல் பலத்தை ஒருங்கிணைத்து அல்லல் படும் மக்களுக்கு ஆறுதல் செய்ய தமிழக அரசுகள் தவறிவிட்டன. எனவே உலகத் தமிழனத்தின் தானைத்தலைவன் என்றெல்லாம் இனி இந்தியாவில் யாரும் பட்டம் சூடிக்கொள்ள முடியாது. மலேசியா, சிங்கப்பூர், மொரிசீயஸ், தென்னாப்பிரிக்கா போன்ற நாடுகளில் வாழும் தமிழர்களுக்கு நாளை ஒரு பிரச்சனை என்றால் இந்தியத் தமிழ்நாடு வெற்றுக் கோஷம்தான் போடமுடியுமே தவிர அரசியல் ரீதியாக ஒன்றும் செய்ய முடியாது.

எனவே இச்சூழலை அவதானித்து மலேசியா செய்திருக்கும் பாடலே அனைத்துத் தமிழர்களும் பாடத்தக்க தமிழ் மொழி வாழ்த்தாக அமையமுடியும் என்பது வெள்ளிடை மலை!